Sábado 1 de setembro de 2012
Como todos os anos, polo mes de setembro, celébrase a “Andaina Popular Concello de Riveira”. Xa imos pola X edición desta actividade, a cal, ano a ano vai gañando en participantes, tanto de dentro coma de fóra do noso Concello.
Nesta edición, salvo mínimas modificacións, o percorrido será similar ao do ano pasado. Algúns dos lugares polos que pasa este roteiro, son:
-Parque Periurbano de San Roque
-Lagoa de Vixán
-Parque Natural
-Lagoa do Carregal
-Monte Tahume
-Dolmen de Axeitos
-Miradoiro da Curota
-Miradoiro Valle-Inclán
-Praia de Coroso
Organización
Esta proba está organizada pola Sección de Sendeirismo da Asociación “As Miñoteiras”, contando coa colaboración da Concellería de Deportes do Concello de Riveira, Protección Civil de Riveira, Policía Local de Riveira, Asociación de Veciños de Carreira e Asociación Arrecó.
Saída
A saída será desde o Polideportivo Santa Uxía, na praia de Coroso, ás 9:00 horas, sendo preciso persoarse no punto de saída, como mínimo 30 minutos antes do inicio da proba.
Roteiro
Estará sinalado con marcas verdes fosforescentes e cintas brancas e vermellas cunha distancia máxima de 200 m entre sinais. Ao longo do percorrido haberá persoal da organización para axudar e informar.
Controis de paso
Haberá controis de paso, polos que os participantes deberán pasar nuns tempos mínimos e máximos, calculándose os mínimos a razón de 4,2 km/hora, e os máximos a 6,5 km/hora. A organización non se inmiscuirá en como se realicen os tramos entre controis de paso (andando, correndo…) sempre e cando se cumpran os horarios mínimos e máximos, e non se moleste ao resto de participantes.
Novidades
• Teremos dous percorridos:
A) Distancia habitual de 50 km.
B) Versión reducida de 36 km que comparte o itinerario nun 90% coa longa, pero que evita as fortes subidas do itinerario longo.
• (O prezo de inscrición será o mesmo para ambos os percorridos, sendo sobre o terreo cando o andarín deberá optar por un deles)
• Obrigatoriedade de portar un bidón ou cantimplora que se irá recheando nos avituallamentos (eliminación das botellas de plástico).
• Así mesmo, será obrigatorio (para mellorar a seguridade dos participantes) portar un teléfono móbil (coa batería ben cargada!!!) no que poder localizar os andarín que non pasen polos controis, ou co que podan avisar á organización en caso de que lle xurdan problemas graves.
Cotas
As inscricións (pago incluído) que se realicen antes do 27 de agosto terán un prezo de 15 euros (13 os federados).
A partir do 27 de agosto, as inscricións terán un custo único de 25 Euros.
Usuarios
Rexistrate
Mapa
Contacto
